Helsesoga for Radøy av Meinert Helland og Ingvar Fykse.
Pris: kr 150Boka inneheld glimt frå den lokale helsesoga frå 1600-talet og til vår tid. Den har fire hovudkapittel. Det første omhandlar tida frå 1600 til 1900. Andre kapitlet er frå 1900-talet. Dei to siste kapitla er ein biografi om helsearbeidarane Gunnar og Elsa Jordal.
Boka inneheld naturleg nok mest stoff frå dei to siste hundreåra. Ein kan m.a. lesa om dei store epidemiane som herja på Radøy, - kjønnsjukdom i 1799, koppar i 1807, kolera i 1849, tuberkulosen, spanskesjuka og mange fleire. Lege- og jordmortenesta er omtala saman med mangt anna som har betydd mykje for helsetenesta på Radøy.
Etter kvart som ein har fått kjennskap til og innsyn i kor vanskeleg folks kvardag kunne vera, sit ein att med ein enorm respekt for dei som levde før. I vår tid leitar folk etter røtene sine. Om radværingen kan det trykt seiast at ”han er runnen av karrig jord”. Folk måtte klara seg med det dei hadde. Det kunne til tider vera lite, ofte for lite. Sogeboka inneheld sterke skildringar av svolt, sorg og naud, men den fortel òg om kor folk ordna seg. Humor, sjølvironi og glitrande forteljekunst var nødvendig om ein skulle klara seg gjennom byrdefulle kvardagar.
Ingvar Fykse og Meinert Helland har skrive og redigert boka. Elsa og Gunnar Jordal med god hjelp av Bente Kopperdal har samla stoff og leita fram skriftleg kjeldemateriell. Utan deira innsats hadde det ikkje blitt bok. William Kay har vore dataekspert og m.a.halde styr på bileta. Mykje stoff er henta frå dei årlege medisinalrapportane som distriktslegane skreiv. I tillegg har mange eldre fortalt det dei hugsar frå eigen barndom, og det dei minnest foreldra, besteforeldra og oldeforeldra fortalde.
Boka er på 272 sider, rikt illustrert. Alt skrive- og innsamlingsarbeid er gjort på dugnad. No at produksjonskostnadane er dekka, går alle inntektene direkte til eit misjonsprosjekt i samarbeid med soknerådet på Radøy.
